الصلاة لا تعالج الأكتئاب

الصلاة والايمان مهمين في الصحة والمرض، قربك من ربنا هيديك عزيمة تكمل الحياة لكن لوحده يبقي تواكل مش توكل
in arabic by

أنا اكتئبت مرتين فى عمرى وخفيت الحمد لله وبنتكس من وقت للتاني، هذا المقال هوأشجع كلمات ممكن أكتبها في حياتي، اعتراف بحاول أن أكتبه لأصف سرطان الروح وأساعد البشر فى هزيمته لأن كتابي الثاني بدأت فكرته برسالة ست قالتلي أن مقالاتي عن الاكتئاب في كتابي الاول ساعدتها علي معرفة مرضها فقررت تهزمه واتعالجت.

-الاكتئاب بيخنق روحك ويصيبك بالعمي عن الحياة وتقع في بير ضلمة لوحدك، سامع الناس بس مش شايفها ولكنه فى النهاية مرض زى أى مرض حسب أحدث النظريات العلمية بيكون بسبب خلل في كيمياء المخ.

– الاكتئاب ملوش علاقة بالدين والناس التى تتهم المكتئب أنه بعيد عن ربنا ولو صلي أكترهيخف فكلامها مؤذي نفسيا جدا لأنه بيزود احساسه بتأنيب الضميراللى بيبقى عالى فى الاساس وممكن يبعده أكترعن العبادة خصوصا مع شلل الارادة اللى بيصاحب الاكتئاب واللى بيمنعه من القيام حتى بواجباته اليومية، اذن لهزيمته محتاج علاج فعلي وقوة ارادة، عمرك رحت المستشفي بزايدة منفجرة فالدكتور قالك أنت مطلعتش زكاة السنة دي فالزايدة انفجرت !

– فى فرق كبير بين الاكتئاب اللى هو فعلا مرض وبين الحزن اللى هو حالة تصيب البشر نتيجة حدث مؤلم وبين الطاقة السلبية اللى كلنا بنتعرضلها فى محيطنا كل يوم، أذن ماتبقاش موهوم بعد قراءة المقال أنك مكتئب لأن كلنا مضغوطين وأحيانا حزانى جدا لكن مفيش مرض مسيطر على دماغك بيدفعك للانتحار، الناس اللى بتصحى من النوم تقول أنا مكتئبة النهاره دى بتدلع لأن ببساطة المكتئبين مابيقدروش يشتكوا.

– الاكتئاب بيخليك أحيانا بتفكر تنهى حياتك، جزء من أعراض المرض أنك تبقي عايز تخلص من الوجع وحاسس مفيش أمل فى بكرة والأمل هواللى بيخلى الناس عايشة ومستحملة، بيخليك حاسس أن محدش هيقدر يساعدك ولا يطلعك من اللى أنت فيه، بيحسسك أن كل الطرق اتسدت وكل ده مش حقيقى ربنا رحمته وسعت كل شىء وفى خلال شهور بيبقى حال الانسان اتبدل وأبواب جديدة اتفتحت فى وشه، ربنا كريم بعد كل عسر يكافىء الانسان بيسرشديد.

– الناس اللي بيتعاملوا مع مريض اكتئاب لازم يبطلوا ينظروا عليه بكلام زي .. انزل اتمشي شوية – قوم فرفش واتفرج على مسرحية حلوة – قرب من ربنا – سافر الهند – قصي شعرك واقرى كتاب مفيد – أنت محسود .

 اتهدوا كفاية عذاب المرض نفسه مش لازم سخافتكم فوقها، دي مش مساعدة دي مناهدة.

–  فى فنانين كتيرمرضي اكتئاب لأن العملية الابداعية مرتبطة بالمشاعرولأنهم كائنات حساسة بزيادة وعندهم أبعاد وخيال وحياة كاملة جوا دماغهم، روحهم مدينة جواها ألوان ماتخطرش علي بالك، الرسامين والأدباء والشعراء والروائيين، الناس اللي عندها أفكار بتتولد في دماغها عندها أوجاع كمان جواها.

–  الاكتئاب مرض نفسي بيولد عرض جسدي بيختلف من واحد للتانى مثل الصداع المزمن، التهاب الاعصاب، أمراض المعدة وطبعا البانك اتاك اللعينة ” نوبات الهلع” لما تحس أنك خايف وقلبك بيدق بشدة ومش عارف تتنفس دي نازلة مع كتالوج المرض لا مفر منها .. الجسم بيدبل مع الروح ! .. غير لخبطة الأكل والنوم وتشتت التركيز.

–  مرضي الاكتئاب زي مرضي السكر، لازم ما ياخدوش طاقة سلبية زيادة ولا صدمات ولا نفسيتهم يهلكوها زي مريض السكر اللي صينية بسبوسة تقضي عليه.
اللي بيخف من الاكتئاب بيبقي عايش بالملاحظة ومتعايش مع مرضه، عارف الاعراض والعلاج، لازم ياخد باله أنه عرضه للمرض فى أى وقت زى مريض الحساسية.

–  مرضي الاكتئاب أكترناس فرفوشة بيقدروا قيمة النورلأنهم عاشوا في البيرالضلمة كتير، بيترنحوا بشدة في المود من أقصي اليمين لأقصي الشمال، من الرقص في حفلة والضحك لبانك اتاك فجأة.

 –  الرياضة والجنس والشيكولاته والكيوي كل ده فشنك كلها مسكنات موضعية بتزود هرمونات السعادة بطريقة مؤقتة لأن الاكتئاب بيخليك ما تحسش بطعم الدنيا، اللى بيفرحك مبقاش فارق معاك، بتزق في حيطة علشان تروح الجيم وبتشعر بالملل من أول بوسة ولوأكلت محل شيكولاته في مشكلة قائمة وصدمة مش هتعرف الشيكولاته تلزق قلبك المكسور، المرض بيخلى الواحد لا عنده نِفس ولا نَفس يعمل حاجة.

–  مصروالدنيا كلها ماشية علي أدوية اكتئاب، هى عكاز من مرحلة لمرحلة لكن لو ماساعدتش نفسك مش هتخرج ومش هتبطلها.

–  في ثلاثة أنواع من الدكاترة النفسيين

دكتورينظرعليك .. ما حياتك كويسة وفى ناس تتمني نصها.

دكتوريهريك أدوية من غير ما يسمعك ولا أنت محتاجاها.

 دكتورمحترم بيسمعك ويساعدك ويوجه تفكيرك ولو حالتك محتاجة أدوية بيكتبلك جرعة صح و يساعدك بخطة للعلاج النفسي بجانب الدوائي.

– الحاجتين اللي فعليا بيعالجوا الاكتئاب “الشغل والحب”

اشتغل كل حاجة وأى حاجة وتفاصيل كتير وحاجات بتحبها وأعمال خيرية، اعمل عملية احلال للتفاصيل السلبية الحزينة فى عقلك بأخرى ايجابية ومسببة للنجاح.

 حاوط نفسك بناس بتحبها، الحضن هو الدوا الحقيقي للاكتئاب، حضن ناس فعلا بتحبك وبتحبها، العلاقات الانسانية الصادقة هى اللزق الحقيقي اللي بيجمع الروح المفلوقة نصين.

– الصلاة والايمان مهمين في الصحة والمرض، قربك من ربنا هيديك عزيمة تكمل الحياة لكن لوحده يبقي تواكل مش توكل، يعني تصلي وتنزل تشتغل مش ترجع سريرك تنام، تدعي ربنا وتقوله أنا بعمل مجهود وبروح لدكتور وبنزل اشتغل وبتعالج أنا مش يائس من رحمتك أنا ضعيف ومكسوراجبر قلبي فأنت الكريم الجبار، كلنا ملناش غير ربنا وبس.

في ناس بتقول رغم صعوبة الامراض النفسية إلا أنها بتقربك أكتر من انسانيتك ومن روحك.

فكلنا مرضي بطرق مختلفة ودرجات مختلفة .. كلنا بشر !

10 Comments

  1. i liked your article until the last part which i thought is somehow theoretical and not far off from what you yourself called ridiculous and condescending. Doing good deeds, work, and getting hugs don’t cure depression dear. Depression can lead a person to not being able to leave bed and can stay all day staring at the wall avoiding contacts. Depression can make you unable to give or receive hugs and when you do, you feel nothing. Just a void. Nothingness. A young German doctor once told me cancer doesn’t kill people, depression does. Depression is far crueler than cancer. Thank you.

  2. A great Article….and so very true…if only people can stop being argonat about depression….and if only u can find the love to cure.

  3. God bless you, I feel and understand every word you said because I been through it, your words doesn’t lessen your belief in Allah but strengthen it, Allah wants us to persist, work and fight, depression is chronic sometimes we fall back into it but we can cope, know our escape away and fight back💪

Leave a Reply

Your email address will not be published.

*