بتونس بيا

بتونس بيا

in arabic by

بدأت مؤخرًا ما أسمعش نظرية العظيمة الراحلة وردة في أغنية ” بتونس بيك “، وأبحث عن نظرية ذاتية أخرى غير قائمة على الآخر، وهى ” بتونس بيا “.

غادة لطيفة بتنزل نشتري مع بعض هدوم.

مابقتش قاسية عليا زي زمان، لوالبنطلون ما قفلش .. بتضحك، وتجيب مقاس أكبر؛ ما بتعيطنيش في البروفة، وتنكد عليا، ونمشي.

بقت بعد يوم طويل وشاق مليان مشاكل، بتسمعني مزيكا، وتعمل لي نسكافيه، وتشتري لي كتب، ونقراها سوا في هدوء.

بتنزل تمشي معايا لمسافات، وبطلت تبكتني، وبطلت توريني الدنيا وحشة، وتخليني أمشي أعيط في الشوارع زي زمان.

بدأت تقولى كلام جديد؛ إحنا مابقاش فارق معانا الصحاب اللي خذلونا ومشيوا، وإنها هتفضل جنبى. ما دام هي قوية يبقى هتسندني، لكن أنا لازم أسمح لها بكدة كل يوم، علشان نسند بعض لأنها اكتشفت إننا ملناش غير بعض.

سمحت لي أبقي صريحة للأخر، واللي يحصل يحصل.

بقت ألطف مع الأيام .. ومش شايلة الهم .. خلت روحي أخف.

بطلت تأنب ضميري، وتستعجلني علي الشغل؛ الشغل ما بقاش هدف الرحلة، لكن مجرد بنزين.

ما بقتش بتخليني أعيط لما أبص في المراية، وتحسسنى أنى عجوزة؛ بقت بتدورعلى حاجة تفرحني بيها في ملامحي.

بقت متصالحة معايا إنى مجنونة، وفهمت إن جوايا أصوات كتيرغصب عني.

بقت بتعمل لي أكل صحي، لكن بتحترم ضعفي الانساني قدام المانجة والنوتيلا .. غادة ما بقتش بتحسسني إني ضعيفة.

بقت فاهمة أن روحي هشة، وما بقدرش أسمع مشاكل الناس، وأنا وهي مش هنغيرالكون.. الكون بتاع ربنا.

أنا بقيت أهدى وأسعد لما هى بطلت تجلدني، وتستعجلني، وتحاول تغيرني بالعافية، وتقول لي أشوف آراء الناس قبل سعادتي.

غادة تعبت من كل أيام الاكتئاب، واتهدت ما بقاش عندها طاقة تضايقني. عيطت كتير وعيطتني، بقت بتطبطب عليا وبطلت جلد الذات.

غادة سمحت لي أخيرًا بشوية سلام نفسي معاها، لما سمحت لها تبقى قوية، ومرنة، ومستقلة، وحنينة. وسابت جلد الذات، وكلام الناس، والمفروض، واللي لازم .. سمحت للأخرى بداخلي أن نصبح أصدقاءً، فأصبحت قادرة بجدارة على أن اتغلب على نصف مشاكل الحياة، التى تبدأ داخلنا أولًا.

مفيش حد هيعرف يحب غيره، لو ماقدرش يحب نفسه.

دايمًا بفتكر المشهد العبقري لأشرف عبد الباقي في فيلم حب البنات، لما قال إن كل المشاكل النفسية للإنسان ليها علاقة بالحب ..

واحد مش عارف يحب حد بيحبه، أويخلي اللي هو بيحبه يبادله شعوره

مش عارف يحب اللي حواليه، أويخليهم يحبوه

مش عارف يحب نفسه، أوبيحب نفسه بزيادة
كل الأشياء تبدأ وتنتهى داخلك .. افتكر دايمًا قبل ما تفهم الآخرين، حاول أن تفهم نفسك أولًا وتحبها. لا تبقى أناني، ولا تبقى ظالمها .. هى الوحيدة اللى هتفضل معاك لأخرالرحلة.

لازم تفتح قلبك على مفهوم إن كل واحد بيحبك بطريقته ..

– الطفل لما يديك حتة من الشكولاتة بتاعته.. يبقى بيحبك

– جدتك لما تقولك رأيها حتي لومعترض على ذوقها القديم.. تبقى بتحبك

– البواب لما يضحك فى وشك.. نوع من الروقان

– مراتك لما تقولك أنتَ فين؟.. مش لازم بتراقبك، يمكن بتخاف عليك، وواحشها

– الراجل اللى يقولك لبسك ضيق.. مش بيتحكم فيكى قد ما بيغيرعليكى

– الطبطبة التلقائية من حد كبير.. مودة

– الضحك للبشر في الشوارع.. مش لازم معاكسة يمكن صدقة

– الصاحب اللي يفهمك حتى لو بعدت مسافات، لكن بتعرف تلاقيه كل يوم جنبك.  يبقى رحمة ربنا بتترجم فى صورة بشر جنبك.

– الكون لما السما تشتي بتبعت لك خير، وبتفتح أبوابها علشان أنتَ تدعي…الكون بيحبك

– لماتسأل ربنا سؤال، ويبعت لك حد بأشارة كإجابة للسؤال…لازم تتأكد إنه سامعك وبيحبك

دائمًا البشر يبحثون عن نوع معين فقط من الحب، فبالتالي تتوهك الوجوه الأخرى للمحبة في الزحمة !

Latest from arabic

خمس تصرفات تخسرك الست اللى بتحبها

أعصاب الستات

الست اتخلقت اعصابها خفيفة وبتضعف أمام صدمات الحياة كل يوم اكتر فى
هذه الاسباب التي تجعلك تخسري الراجل النسوانجي وانتي الكسبانة

 رسالة من جدتى

  عزيزتى جدتى .. دائمًا يخبرنى أبى: عندما أتمرد أننى حملت جزء
هذه الاسباب التي تجعلك تخسري الراجل النسوانجي وانتي الكسبانة

رسالة من جدتى

  عزيزتى جدتى .. دائمًا يخبرنى أبى: عندما أتمرد أننى حملت جزء
هذه الاسباب التي تجعلك تخسري الراجل النسوانجي وانتي الكسبانة

العلاقة المريحة

ساعات تقوم الصبح مهموم وحاسس أن قلبك بيوجعك وجسمك تقيل وبترجم الحالة
هذه الاسباب التي تجعلك تخسري الراجل النسوانجي وانتي الكسبانة

العقل المثير

لسنوات كنت اسأل كل من أقابله ما الذي يجعلك تقع في غرام

Pin It on Pinterest

Go to Top