ترجعى لطليقك ولا ماترجعيش ؟

in arabic by

 

كان فى بوست لصديق كاتب ينصح فيه الست اللى طليقها بيزن يرجعها أنها ترجعله، وبيقول أن الراجل اللى بجد هو اللى يطلب من الست تتجوزه فما بالك بالراجل اللى طلع من قفص ست وشاف الحرية وراجع لنفس القفص برجليه !

أنا كتبت عن الطلاق كتير، عن أسبابه والملل اللى قبله وأمتى يكون قرار متهور وأمتى يكون بداية جديدة، عن التعايش بعده مع النفس والمجتمع، لكن النهارده هكتب للستات الحيرانة بعد ما عدت بكل الحفر والمطبات وبدأت المشى على الطريق المسفلت فى قلبها، لما يرجع حد يكعبلها تانى المفروض تعمل ايه ؟!

الطلاق طلقة فى قلبك وكسرة ضهر، عمر ما حد بيتجوز وفى عقله فى يوم أنه ممكن يبدل القسيمة الحلوة بقسيمة تمثل شهادة وفاة لسنين عمرعدت، عمر ما الست بتتخيل أن فى راجل وعدها بالأمان هيمشى ويخذلها ويعرى ضهرها أو هتخوض حرب لمجرد أنها تصحى الصبح مش على ذمة قلبه، فخلينا متفقين أنك مكسورة وبتعافرى وبتكابرى وشجاعة مش ضحية.

أول سؤال لازم تفكرى فيه .. اتطلقتوا ليه ؟

شفت ناس اتطلقت فى خناقة هبلة، لقلة خبرتهم أو ثقل طشة المسئولية الأولى فى الجوازعلى قلوبهم، قالتله بزعيق “طلقنى” .. قالها ” أنتى طالق”، اتصدموا وبعد البعد يومين ظهرالحنين والندم .. مايرجعوش ليه  ! هيتعلموا الدرس ويعرفوا أن الطلاق مش كلمة سهلة فى خناقة بتطلع .

وفى ناس بتمل، بعد سنين جواز وخلفة بتزهق، بتشوف أن الحل فى أن القفص المقفول يتفتح ونطير، لكن بيلاقوا بعد فترة أن اللى جوا القفص زى اللى براه وأن الحياة هى اللى بقى أوكسجينها أقل ورتمها أصعب .. شكلنا بنكبر وبنعجز وبنرفض بأى طريقة سنة الحياة.

فى مشاكل أكبر من التسرع أو الملل، مشاكل بتطفى الست من جواها وتدبل يوم ورا يوم والورد بيدبل وتقع أوراقه حتى لو اتروى مابيرجعش، لأن اللى بيروح فى الدنيا مابيرجعش يا سادة .. فلو سبب الطلاق لسه موجود فكرى تانى هترجعى أنتى ليه !
لو لسه الحد اللى بيخون عاجبه ماسورة النسوان حواليه هتحشرى نفسك فى الزحمة تانى وماتعرفيش تتنفسى صبح وليل وتضيق الدنيا على وسعها فى عينك وثقتك بنفسك تروح واحساسك أنك آدمية يلزق فى كعب صاحبته الجديدة، هتعيدى كل السيناريو الحزين من الأول ؟

لو لسه أهله بيتحكموا فى حياتك وحياة ولادك

لو لسه بيضربك ويتأسف

لو لسه بخيل وكسلان يصرف أو يحب أو يطبطب أو يحامى ويحمي

لو لسه مش عارف يبقى أب

لو لسه مدمن .. مدمن سهر ومدمن صحاب ومدمن اهانة ومدمن اهمال ومدمن تحكم

لو لسه كل يوم الصبح مدمن فكرة أنك بتاعته زى كرسى سفرة مرمى بفلوسه اشتراه ومش من حقك تطلبى حنية واحترام واهتمام .. هترجعى لواحد مدمن ليه !

مش شرط كل راجل بيرجع يبقى بيحب ما يمكن أنانى ومحدش استحمله، ما يمكن مش مبسوط من غير ولاده ودفا البيت بغض النظر كان بيدى ايه مفتقد اللى كان بياخده، ما يمكن ساب صاحبته وقرر يرجع للاستبن أم العيال .. ويمكن ندمان حقيقى ماحدش بيدخل فى نوايا وقلوب البشر غير اللى خالقهم هواللى عارف يسامحهم، أنتى مجرد بشر يمكن تعرفى أو ماتعرفيش المهم على نفسك ماتدوسيش.

قدرة كل ست على الغفران أوالنسيان تتناسب طرديا مع مقدار الحب اللى فى قلبها وشكل الحياة قبل الطلاق، يعنى لو كانوا مبسوطين وافترقوا فى أزمة يمكن تنسى وتغفر ومطب وخلصنا، لكن لو كانت عايشة مطفية ولقت نفسها بعد الطلاق فى غيابه أخف ومحلوية ترجع ليه للضلمة والهم والمناكفة !

الحاجات اللى بتلوى دراع الست بعد الطلاق معروفين ..

  • أهلها وأصحابها.. ارجعيله وأبو عيالك وكل الرجالة زفت وأحسن من غيره والخازوق اللى نعرفه أحسن من اللى مانعرفوش.

ماتصدقيش غير قلبك، فى النهاية أنتى الشخص اللى هينام جنبه فى نفس السرير ويتنفس نفس الأوكسجين لو مش عارفة تتنفسى هتموتى ومحدش هينفعك أو يلحقك ولا الخازوق اللى بتاخديه للمرة التانية هيبقى قادريحس، أنتى اللى عملتى فى نفسك كده وسمحتيله بالوجع من أول وجديد، اشتغلى على احساس أنك تستاهلى الحب وتستاهلى حد يحترمك وتقولى لنفسك كل يوم الصبح أنك قوية وجميلة وذكية وأن العمر قصير تتونسى فيه لوحدك من غير راجل أو مع راجل يقدر قيمتك ويحبك لكن كل المحاولات البائسة مع أعمى مش شايفك أيام ضايعة من عمرك.

  • الفلوس .. فى ستات مش بتحب تشتغل وتتعب نفسها وممكن تهين كرامتها مع واحد فى سبيل أنه بيصرف وهى بطة وتطنش، عموما دى اختيارات فردية بس هوووووش ماتشتكيش، وفى ستات مطحونة علشان تصرف والرجالة بيطحنوهم أكتر بالتزامهم المالى تجاه العيال، يبدو لى الأستقلال المادى مفتاح حرية لاتخاذ قرار بالبقاء أو الرحيل، لو سمحتى اشتغلى.
  • العيال.. أكبر صراع بتعيشه زوجة أنها تهجر زوج سيىء أنه يبقى أب كويس، نظرية يا أنا أعيش ياولادى تعيش، الفكرة أن نسبة مقاومة كل ست فى تكبير دماغها بتختلف من واحدة للتانية، ممكن ست تعيش مع راجل مش شايفاه وممكن واحدة تهد الدنيا لو مقالش صباح الخير، لكن تبقى دائما الأم السعيدة قادرة تربى ولاد سليمة نفسيا.

الزمن بيجاوب على أسئلة كتير جواكى، المواقف اللى بيمر بيها البشر كل يوم بتعيد ترتيب أولوياتهم، يمكن تبعدى وتحسى بحنين وتحبى ترجعى وتخوضى حرب التغيير أو تبقى أكثر تقبلا وتعايشا مع الباقى من عيوبه بعد التغيير، وممكن رغم كل مشاكل الطلاق تبقى أسعد وأريح .. التجربة هى الفيصل، الاجازات وأعياد الميلاد وأعياد الحب، أيام المستشفيات وصوان العزاء وأول يوم رمضان .. كل الأيام اللى بتنامى من غيره فى سريرك بيوحشك ولا مبسوطة من غيره أو يمكن بتفكرى فى غيره.

لما ترجعى لراجل كسرك أوعى يغيب عن بالك فكرة أنه قدر زمان يكسرك فخليكى أقوى وشروط أنك ترجعيله ..

” التغيير” سبب الطلاق اختفى، عمل مجهود حقيقى واختلف فنضمن مستقبل مختلف عن الماضى

” الندم” نص طريق التسامح أسف وبقيته ندم، كفاية بجاحة وحاجات مضمونة فى حياتنا

” الحب” يا عزيزتى المشاعر هى اللى لازم تحركك لا العيال ولا الفلوس، لما أشياء أخرى بتحكمك بتبقى تعيسة ومطفية لدرجة أنك شبح، شبح عايش تايه مع وحش وشبح بيربى العيال فتأثيره عليهم بهتان.

مايمفعش انصحك لأن كل زوجين حالة لكن بحاول أساعدك تمسكى أول الخيط اللى يرتب طريقة تفكيرك لكن القرار لوحدك من غيرمقال أونصيحة أهل أوتجارب صحاب، هتعملى اللى يسعدك لوعايزاه دافعى عنه باستماتة ولو بتكرهيه اطرديه للأبد لكن ممكن أقولك وبقوة اتبعى احساسك واقتلى فى الحياة أى موقف أوانسان ممكن يحولك لشبح، افتكرى أن عالم الأشباح هو مقرالأموات وأنتى لسه حية.

5 Comments

  1. البوست ده مطلع الستات كلهم ملائكة والرجال هم سبب الطلاق!؟!؟!!؟؟؟؟؟؟
    مش ممكن في ست مهملة لبيتها؟ وبتهين جوزها؟ ما بتحترمش اهله مثلا؟ طول النهار نايمة في السرير؟ او طول النهار في شغلها ورامية كل حاجة؟ او طول الوقت مع صحباتها؟ او او او او …….
    هل كل اسباب الطلاق راجل؟
    كل اما الزمن بيمر بنشوف عجب العجاب .
    الستات ضحية والرجال هم المجرمين.
    ده ما يمنعش ان في رجالة مش كويسة
    بس بردو في ستات مجرمة وبتجرر اجوازتها في المحاكم حتى لو واخدة حقها
    وتمنع الاب يشوف ولاده
    والاب يا عيني يصرف عليهم وفي الآخر من حقه ٣ ساعات رؤية في محكمة وممنوع استضافة
    لا حول ولا قوة إلا بالله

Leave a Reply

Your email address will not be published.

*