خمس تصرفات تطفش الراجل اللى بتحبيه

in arabic by
  •     انتقديه

كل حاجة يعملها زهقيه فى عيشته وعلقى عليها، ليه جبت ده ؟ ليه دفعت ده ؟ قوليله وهو سايق ادخل من الشارع اللى جاى يمين، ماتديش للبواب فلوس كتير، أنت مابتحبش حاجة غيرالعربيات، مش بتشجع غير الزمالك اللى دايما خسران، هيحس أنه دايما حاجة ناقصة فى دماغه وأنتى بتكمليها أو مكسور وبتصلحيه.

  •   راقبيه

كنت فين ومع مين وفتشي فى موبيله وخدى باسورد الفيسبوك وأرقام أصحابه وكلميه ستلاف مرة وهو مع أصحابه، حسسيه أنه متحاصر وقاعدة على قلبه طول الوقت، بيحب مخبر من القسم.

  •  ارغى على قلبه

لازم يشاركك تفاصيل حياتك كلها، درجة لون صبغة شعرك، مشاكل بنت عمتك مع خطيبها، مشاكل أبوكى مع عم شعبان البواب، مشاكلك فى الشغل مع فاتن وسعاد .. امال هو وظيفته فى حياتك ايه لو ماسمعكيش؟

نجاح الست بيهدد قدرة تحمل أى راجل لأنه فى الغالب بياخد من وقتها وبيحسسه أنها ممكن تستغنى عنه، يا هيحبها يا هتهجره، ماتبطليش كلام عن شغلك وقد ايه أنتى مهمة وعظيمة افردى عضلاتك تخبط فى عينيه.

  •  بطلى تحضنيه وتدلعيه

تجاهلى احتياجه للحنية كفاية تلزيق، خلصنا شغل المراهقين بتاع الأغانى والسينما والكلام الحلو والهدايا، جبتى كل البرفانات والساعات اللى فى البلد خلاص بقى مجاتش على عيد ميلاده ده ولا المناسبة دى، أسرع وسيلة أن الراجل يدورعلى غيرك أن علاقتك بيه مايبقاش فيها جديد ومملة وواحدة تانية تهتم بتفاصيله الصغيرة وتدلعه على الريق.

  •  قارنيه برجالة تانية

جوز سعاد جابلها عربية جديدة، وزميلتى فى الشغل حاطة صورتها مع جوزها لما سافروا باريس يحتفلوا بعيد جوازهم، عادل اللى كان متقدملى سافر العراق اعارة، المهم يحس دايما أن فى راجل أنتى شايفاه أحسن منه على الكوكب.

اضمنلك بكل اللى فات أنك هتخسرى الراجل اللى بتحبيه بأسرع ما انتى متخيلة ويمكن أنتى مش قاصدة لكن الرجالة بيحبوا الحرية وأنه يبقى قائد فى العلاقة ويشعرأنه مالى وقتك وعينك، وأن اهتمامك من غير خنقة لكن بكثير من الحنية والمشاركة .. صاحبيه هتكسبيه.

Leave a Reply

Your email address will not be published.

*