خمس حاجات تافهة شاغلة الرجالة فى الجواز


in arabic by

قريت مؤخرا مقال بعنوان ” خمس حاجات لو لقيتها فيها اتجوزها بدون تفكير” لكاتب راجل على موقع Ragel.com .. فقلت لا بقى الموضوع محتاج رد لأن الجواز مودة ورحمة مبنى على السكن لروح بتستكين معاها مش لضعفها قدامك وتخدم فى البيت من سكات، الجواز ملوش كتالوج وأنت مش شارى غسالة بمواصفات الجودة يافندم.

المقال بيقول أن أول سبب الست تتجوزها عشانه أنها تكون ” طباخة محترفة “
أنا ماعنديش أدنى اعتراض أن الأكل مهم لكن صاحبتى الحلوة اللى اتجوزت حب عمرها وخلفوا عيلين مابتعرفش تلف محشى ورق عنب وأخرها تحمر بانيه للعيال وبتحرقه .. السؤال هنا هل الست دى ماتنفعش زوجة وعيالها مش بيحبوها كأم .. بس كده !

هو بيقول أن لو بقالها عشرين سنة عند أهلها مش بتطبخ مش هينفع بعد الجواز تتعلم، الطبخ مهارة قابلة للتعلم، مفيش ست بتتولد زوجة أو أم لكن بالوقت بتشيل المسئولية .. حضرتك محتاج تتجوزعند الشيف شربينى مش مأذون !

السبب التانى ” بتتفرج على الكورة وبتشجع فريقك المفضل ومن قلبها مش كده وكده “
مش طلب صعب شوية لأننا نعثرفى نفس البيت على اتنين أخوات كل واحد فيهم بيشجع فريق مختلف وبعدين البنات أصلا مابتحبش الكورة وأنا ممكن أعجزك وأطلب منك تتفرج معايا على مسلسل تركى نص مليون حلقة ..هتوافق ؟

السبب التالت ” بتعرف تسكت “
هى الست المفروض تتعلم الصمت ولا فن الحديث، أيهما أقرب للقلب ؟ تعرف تمشى وتختفى وتسيبك لوحدك ولا تقدر تضحكك أو تشاركك مشكلة فى شغلك أو حتى تتكلم عن فريق الكورة اللى أنت بتحبه ؟ محتاج تجوز خارسة ؟ ولا محتاجها بتعرف تفهمك وتحتويك ولما تكلمك تحبها أكتر!

السبب الرابع ” أعطنى حريتى واطلق يدى “ الكاتب يطالب أنه يروح القهوة كل يوم ويسافرمع أصحابه لوحده بس نسى يقول وماتطلبنيش فى الموبيل تقولى هات عيش لسندوتشات المدرسة ولو حد من العيال سخن وأنا مسافر توديه للدكتور .. علشان حرية الزوج مهمة اوى لاستمرارالعلاقة لكن الست المرزوعة فى البيت تطبخلك بشاميل وتلف محشى وتشجع فريقك المفضل وتسكت خالص ماتكلمش مش محتاجة تقعد معاها أو تخرجها أو تحس بونس راجل فى البيت بعد يومها الطويل مع العيال وشغلها والمسئولية.

خامس نقطة ” الغفران “ الكاتب عايزالست تفوت وتسامح، طبيعة الراجل مش بيحب يعتذرولا حد يعاتبه لأن هو راجل مابيغلطش، والغريب فى الأمرأنه بيحب يكررأخطائه علشان أساسا الستات يا عزيزى بتغفروتسامح وبتعشش على بيتها طول الوقت، ممكن أنت تفكرماتغلطش كتيرعلشان هى ماتفتكرش كتير، ماتحرقش خلايا قلبها وبعدين تشتكى أن قلبها فحمة.

Leave a Reply

Your email address will not be published.

*