طبعًا فاكرين المقالة الي اتكلمنا فيها عن كل أنواع الزيوت المختلفة والمهمة الي ممكن تستخدموها لشعركم، وهنا هنكملكم بعض النقاط المهمة عن الزيوت الأساسية للشعر

لازم في الأول نفرق بين الزيوت الأساسية والعطرية، لأن كل نوع فيهم مختلف من حيث الخصائص، والفوايد العلاجية بتاعته، والزيوت الأساسية هيا عبارة عن زيوت مركزة جدًا بدرجة عالية، مينفعش تتحط بشكل مباشر على فروة الراس او الجلد، او انها تتحط على الشعر على طول، لأنها ساعتها ممكن تحرق الجلد وتئذي فروة الراس، أما الزيوت العطرية مبتكونش قوية أو مركزة زي الزيوت الأساسية بس فايدتها مهمة زي فايدة الزيوت الأساسية

زيت اللافندر الأساسي: LEO

بيستخلص بشكل رئيسي من زهور نبات اللافندر، وبيستخدم لأي نوع شعر، وزي ما زيت اللافندر له قدرة رهيبة على تهدئة الشعر إلا أنه كمان له خصائص مطهرة ومضادة للميكروبات بتتحكم في حب الشباب والقشرة الي بتكون في فروة الراس، وبيساعد كمان في توازن الزيوت الطبيعية الي موجودة في فروة الرأس، وبيساعد على تنشيط الدورة الدموية، وان الشعر ينمو بشكل أسرع، وبيعالج تساقط الشعر.

طريقة استخدامه :-

لنمو الشعر : اخلطي معلقة صغيرة من زيت اللافندر، مع معلقتين صغيرين من زيت جوز الهند، ولدكي بيهم فروة الراس كويس جدًا وسبيه على شعرك طول الليل، والصبح اغسليه كويس، وكرري الطريقة دي مرتين في الأسبوع لأكتر من شهر علشان تشوفي النتيجة الي عايزاها.

تدليك فروة الرأس الخفيفة : اخلطي من 8 ل 10 قطرات من زيت اللافندر مع معلقتين كبار من زيت الزيتون البكر الممتاز، وزيت جوز الهند أو زيت بذور العنب، ودلكي بيهم فروة الراس وسبيه لمدة ليلة كاملة على شعرك، وممكن تحتفظي بالإزازة علشان تستخدمي منه مرة تانية، وابعدي عن استخدام كمية كبيرة في المرة الواحدة علشان متضطريش تغسلي شعرك كل يوم

زيت الروزماري الأساسي :- REO

زيت الروزماري فيه كمية كبيرة من فيتامين ب والحديد والكالسيوم، وبيتم استخدامه من زمان جدًا لآلاف السنين علشان يعالج الشعر الهش والخفيف، وتم اثباته علميًا إنه بيمنع ظهور الشعر الأبيض والشيب المبكر، وكمان مفيد جدًا في تقوية بصيلات الشعر، وعلاج قشرة الراس، وبيساعد على نمو الشعر وتجديده.

طرق استخدامه:-

تنعيم الشعر: اخلطي معلقة كبيرة من زيت الجوجوبا مع 3 قطرات من زيت الروزماري في طبق صغير، حطيه على شعرك وهو رطب، وسبيه من 13 ل 15 دقيقة، وبعدين اغسلي شعرك كويس بالطريقة العادية، وده هيعالج مشكلة جفاف الشعر بشكل كبير جدًا.

حمام زيت سخن: اخلطي معلقة كبيرة من زيت جوز الهند مع معلقة صغيرة من زيت الخروع وسخنيهم لفترة بسيطة، وبعدين ضيفي 4 قطرات من زيت الروزماري ، ودلكي بأطراف صوابعك فروة الراس والزيت دافي، وسبيه على شعرك لمدة 15 دقيقة قبل ماتغسليه، استخدمي الطريقة دي مرة في الأسبوع أو مرة كل 3 أيام.

طريقة نمو الشعر: في طبق صغير اخلطي بيضة كاملة مع معلقة عسل صغيرة ، ومعلقة من زيت جوز الهند، و 6 قطرات من زيت الروزماري، واخلطيهم كويس لحد مايكون القوام كله متماسك، وحطيه على شعرك وسبيه من نص ساعة لساعة كاملة، واغسليه بعد كده كويس بالمية الدافية، وبعدين نشفي شعرك من غير ماتسخدمي اي حرارة، وكرري الطريقة دي مرة واحدة في الأسبوع لمدة شهر علشان تعرفي تشوفي الفرق.

علاج سريع : اخلطي معلقتين كبار من زيت جوز الهند مع معلقة صغيرة من العسل ، و 3 قطرات من زيت الروزماري، وحطي الخليط على فروة الراس، واربطي شعرك ولفيه بغطاء الشعر، وبعديه اغسليه الصبح.

زيت النعناع الأساسي :-  PEO

بيستخرج الزيت من نبتة النعناع الأساسية، ومليان بالمواد المغذية والمعادن الي مليانة أحماض دهنية ومركب يسمى المنثول، وده مسؤول عن الكتير من فوائد زيت النعناع

الفوائد:-

زيت النعناع له خصائص مطهرة ومضادة للميكروبات الي بتساعد على تخفيف فروة الراس الجافة، وبيقضي على قشرة الراس، وبيحارب القمل.

بيعالج تساقط الشعر وبيساعد على نموه بشكل كبير، لأن المنثول الي موجود فيه بيوسع الأوعية وبالتالي هيساعد على تدفق الدم بسهولة لفروة الراس، وهيمنع تساقط الشعر الي بيحصل بسبب نقص وصول الدم لبصيلات الشعر، وزيادة الدورة الدموية بيحسن نمو الشعر وبيمنع تساقطه.

طرق استخدامه:-

تحذير مهم : زيت النعناع قوي جدًا علشان كده لازم تاخدي بالك انك تبعديه عن منطقة العين والأنف والأذن، ومتضيفيش أكتر من شوية قطرات على أي خليط.

لمنع حكة فروة الراس وجفاف الشعر والقشرة :  ضيفي شوية قطرات من زيت النعناع بشكل مباشر للشامبو والبلسم الخاص بيكي، وبعدين استخدميهم بالطريقة العادية ليكي.

نمو الشعر أو علاج تساقط الشعر : ضيفي من 2 ل 3 قطرات زيت النعناع إلى أي زيت خفيف زي الجوجوبا او اللوز او جوز الهند ، ودلكي فروة الراس كويس وسبيه على شعرك لمدة 30 دقيقة، وبعدين اغسليه كويس جدًا ، وكرري الطريقة دي 3 مرات في الأسبوع لفترة لا تقل عن شهر.

في النهاية خلينا نلخص الاستخدامات المختلفة للزيوت

 

الشعر الجاف : زيت اللافندر

الشعر الدهني : زيت اللافندر

نمو الشعر : زيت النعناع، زيت اللافندر، زيت الروزماري