أنا فشلت
وااااااو ايه الفشل الرائع ده! برافو ده فشل محصلش.. كويس إنك فشلت و انت فاكر انك هتنجح ازاي من غير ما تفشل
Meet The Robinsons ده حوار إتفرجت عليه في كرتون
الحقيقة استوقفني ولمسني قوي قوي.. إستوقفني عشان فكرة الطفل عن نفسه أول ما بيفشل بيكون شايف نفسه إزاي والمربي بيساعده إنه يشوف نفسه إزاي ؟ الطفل ده اللي هو إنت على فكرة وإنت صغير مش أكتر.. هل إبنك لما بيحاول و يعمل اللي يقدر عليه ويفشل في حاجه أو يغلط بتنقده و تقوله أنا قلتلك إن اللي بتعمله مش هيجيب نتيجة؟ ولا بتقوله أنا عارف إنك حاولت وعملت اللي عليك وإن شاء الله المرة الجاية تنجح وقولي بقى إيه الخطوات اللي ممكن تعملها عشان تكون أحسن المرة الجاية ؟ ولا بتقوله اللي في النص بين السيناريوهين دول ؟ اللي هو معلش بسسسسسسسس.. ناس كبار كتيره جدا دلوقتي شايفين قبول الناس ليهم عبارة عن نجاح وفشل…مش شايفين نفسهم مقبولين لمجرد إنهم موجودين وده بيأثر على تصرفاتهم وعلى نظرتهم لنفسهم  وعلى تقبلهم لأفعال الناس وردود أفعالهم و بيخليهم يتحولوا لبالغين يسعون لإرضاء من حولهم دائما.. أو النقيض: يتحولوا لبالغ ناقد أو غاضب غير متسامح، شايفين قبولهم لنفسهم عبارة عن نجاح وفشل وده حصل عشان كتر النقد والإحباط اللي كان بيحصل حواليهم وقت الفشل أو الأخطاء ونظرة المربيين ليهم.. طيب ليه أصلا الطفل بيحصله اللخبطة دي كلها من مجرد كلام بيصدر من أبوه وأمه؟ الأب والأم هم الأمان والقبول بالنسبة للطفل هم العالم الداخلي النفسي والخارجي المحيط هم الأساس في رؤيته لكل شئ في عالمه الصغير بيحتاج الطفل مني ايه لما يفشل: التدليل أم الشدة؟ ما بينهم..

بيحتاج مني محولش فشله ده لفشل شخصي عندي –

بيحتاج مني الإستماع له والإقرار بمشاعره وقت الفشل لإنها من حقه-

بيحتاج مني الإقرار بالفشل ولكن العمل على التقدم وعدم الانسياق للإحباط. –

بيحتاج مني قبولي له الدائم بغض النظر عن الفشل أو النجاح –

 بيحتاج مني أفكر معاه إيه هي الحاجات اللي محتاج يتداركها للتقدم في المرات القادمة. –

بيحتاج مني التطلع معه إلى النجاح وتعلم المحاولة والمثابرة-

 و بيحتاج مني كمان أسيبه يتحمل عواقب أخطاؤه و لو حتى بنسبة عشان أساعده يتعلم و يكبر(و لكن بحب و ليس بشماته)، مش لازم النجاح تكون حاجة ملموسة نجحنا فيها، ممكن النجاح يكون في تقبل أولادنا للفشل عشان يعرفوا إزاي ينجحوا بعدين

ممكن نتعب ممكن نفشل ممكن نحبط بس لما بنمر بالحاجات دي بنحتاج ايه من اللي حوالينا ؟ رد على السؤال ده جوه نفسك والإجابة إعملوها مع أولادكم ومع نفسكم في المراية