خلينا نتكلم شوية عن الزيوت الي بيستخدمها الكتير من البنات، وأنا من الناس الي مجنونة بأنواع الزيوت، وممكن على الأقل يكون عندي زيت واحد بستخدمه في روتي العناية بشعري المجعد، وساعات بستخدمه بشكل مختلف وبطرق مختلفة، بس إيه هيا أكتر الزيوت الي بتساعد على نمو الشعر؟ علشان كده محدش يقلق خالص وهنوضح هنا أنواع الزيوت وازاي تستخدموها

ايه هو الفرق بين الزيوت العطرية والزيوت الثابتة؟

الزيوت العطرية والثابتة مختلفين في الخصائص والهيكل والفوائد العلاجية.

الزيوت الثابتة عبارة عن زيوت مركزة بدرجة كبيرة جدًا ومينفعش تتحط على الجلد أو فروة الراس أو الشعر بشكل مباشر لأنها ممكن تحرق فروة الرأس أو تعمل هيجان في جلد البشرة، أما الزيوت العطرية فبتستخدم في تخفيف الزيوت القوية وبتكون مفيدة زيها بالظبط

أكتر الزيوت العطرية والثابتة الي بتستخدم

الزيوت العطرية : زيت الأرجان، زيت الأفوكادو، زيت الخروع، زيت جوز الهند، زيت بذور العنب، زيت الجوجوبا، زيت الزيتون، زبدة الشيا، زيت اللوز الحلو

الزيوت الأساسية : زيت اللافندر، زيت النعناع، زيت الروزماري

زيت الأرجان :-

فيه نسبة كبيرة جدًا من فيتامين هـ ، وأحماض وأوميجا 3 الدهنية، وكمان فيه مضادات أكسدة، وكل الحاجات دي بتساعد على علاج مشاكل الشعر التالف، او الجاف، أو المجعد.

فوائد زيت الأرجان :-

ممتاز جدًا في حل مشكلة الشعر المجعد، وبيساعد على تنعيم الشعر وحيويته.

بيساعد في نمو الشعربشكل صحي أكثر وبيخلصك من مشاكل الشعر الهش والخفيف.

بيعالج الشعر من أي مشاكل عملتها الصبغة او كتر استخدام المنتجات الحرارية، وممكن تستخدميه في علاج اطراف الشعر المتقصفة.

طرق استخدامه :-

تنعيم الشعر :-

ضيفي شوية قطرات من زيت الأرجان ودلكي باطراف صوابعك على الشعر وهو رطب، واتاكدي انك حطتيه على الاطراف المتقصفة علشان يعالجها.

فرد الشعر :-

حطي شوية قطرات من زيت الأرجان في ايدك، ودلكي بيه المناطق الي الشعر مجعد فيها، لأنه بيساعد على تقليل الشعر المجعد وبيديه لمعة.

علاج قوي:-

استخدمي كمية مناسبة من الزيت ودلكي بيها فروة الرأس، وبعدين غطي شعرك كويس بغطاء الشعر، وسبيه لمدة ليلة كاملة وبعدين اغسليه الصبح، وممكن تضيفي حبة صغيرين من زيت جوز الهند، او زيت الخروع، أو زيت الزيتون.

تنظيف الشعر:-

ضيفي شوية قطرات من زيت الأرجان لحمام الكريم بتاعك وحطيه على شعرك بالطريقة العادية، وسبيه كام دقيقة وبعدين اغسليه كويس بالطريقة العادية.

زيت الأفوكادو:-

زي الفاكهة بالظبط، فيه كمية كبيرة من البروتينات، والدهون الصحية، والأحماض الأمينية، والفيتامينات A,D,E,B6 ، والبروتين الي موجود فيه بيساعد على علاج مشكلة الشعر التالف، وبيصلح أي ضرر حصله، وكمان بيمنع تكسر الشعر، وزيت الأفوكادو من الزيت القوية والسميكة، علشان كده فعاليته بتكون أعلى لو استخدم للشعر المتوسط عن الشعر التقيل.

فوايد زيت الأفوكادو:-

رائع جدًا للشعر الجاف الي بيتعرض للحرارة بشكل كبير

غني بفيتامين هـ  الي بيساعد على تقوية الشعر وبيمنع تكسره.

بيساعد على علاج أطراف الشعر المتقصفة.

أخف من زيت الزيتون، والشعر بيمتصه بسهولة من غير ماتحسي ان فيه حاجة تقيلة في شعرك.

بيساعد على علاج مشاكل فروة الراس، وبيكون واقي من أشعة الشمس الحارة.

طرق استخدامه:-

حطي قطرتين من زيت الأفوكادو على فروة راسك وشعرك رطب، وبعدين سرحيه بمشط أسنانه واسعه علشان يفك أي تشابك موجود في الشعر.

للشعر الجاف والمجعد : استخدمي اطراف صوابعك ودلكي بيها شوية زيت علشان تمنعي جفاف الشعر وتقللي من تجعيده.

ترطيب الشعر : ضيفي قطرة من زيت الأفوكادو لمنتج تصفيف الشعر الخاص بيكي علشان يساعد على ترطيبه بشكل أسرع.

زيت الخروع:-

زيت نباتي فيه خصائص مضادة للإلتهاب ومضادة للبكتيريا، وغني جدًا بالبروتين والمعادن وفيتامين E ، فيساعد شعرك انه يكون رائع، كمان هو الزيت رقم واحد في علاج تساقط الشعر.

فوايد زيت الخروع:-

بيزيد من نمو الشعر وبيتحكم في تساقط الشعر لأنه فيه  أحماض أوميجا 6، والأحماض الدهنية الأساسية الي بتنشط وصول الدورة الدموية لفروة الراس، وبالتالي هيزداد نمو الشعر بسرعة، وكمان بيساعد على تغذية فروة الراس، وتقوية الجذور.

بيحارب عدوى فروة الراس وقشرة الراس بسبب خصائص مضادة للبكتيريا موجودة فيه، ومضاد للفيروسات والفطريات، وبيحل مشاكل الصلع، وحكة فروة الراس.

بيرطب الشعر لدرجة كبيرة جدًا وبيخترق عمق فروة الراس وبيضبطها بسرعة، وبيمنع أي حاجة تأثر على رطوبة الشعر، وكمان بيكون وسيلة سهلة علشان تستعيدي اي معادن شعرك افتقدها.

طرق استخدامه:-

نمو الشعر : اخلطي شوية من زيت جوز الهند مع زيت الخروع، ودلكي بيهم فروة الراس كويس، وبعدين غطيه بغطاء الرأس وسبيه ليلة كاملة على شعرك،وبعدين اغسليه الصبح بطريقتك العادية، وممكن تستخدمي الطريقة دي كل يوم بس تستخدمي كميلة صغيرة جدًا من الزيت علشان متضطريش تغسليه كل يوم.

التخلص من القشرة:

اخلطي معلقة كبيرة من زيت الخروع مع زيت الزيتون، وضيفي عليهم عصير نص ليمونة، وبعدين حطيه على فروة الراس، واغسليه بعدها بنص ساعة.

ترطيب الشعر:

حطي كمية من زيت الخروع على شعرك لمدة متقلش عن 15 دقيقة قبل ماتستخدمي الشامبو، او اخلطي قطرة صغيرة من زيت الخروع مع بلسم الشعر وبعدين اغسليه بعدها بدقايق بسيطة، وممكن علشان ترطبي شعرك تضيفي كمية بسيطة من زيت الخروع مع جل الصبار والعسل وعصير الليمون، وتحطي الخليط على جذور شعرك وتسبيه لمدة نص ساعة وبعدين تغسليه كويس.

زيت جوز الهند:-

مليان كمية كبيرة من فيتامين هـ  وكمية كبيرة من الأحماض الدهنية زي حمض لوريك، وكابريك، والاحماض دي سهلة وبسيطة تقدر تخترق فروة الراس والشعر بكل سهولة، فتغذيها بمغذيات حيوية بيحتاجها الشعر جدًا، وده بيخلي زيت جوز الهند أفضل زيت بيخترق الشعر.

فوايد زيت جوز الهند:-

بيتميز بقوى مضادة للميكروبات كبيرة جدًا الي بتمنع قشرة الراس، وبتمنع العدوى وحكة فروة الراس.

بيمنع ان الشعر يفقد البروتين الطبيعي الي موجود فيه

بيساعد على نمو الشعر بشكل أسرع

بيساعد على ترطيب الشعر الجاف

بيمنع تكسر الشعر ويمنع تقصف أطرافه، وبيبطأ من عملية تساقط الشعر

ملحوظة :-

بما إن زيت جوز الهند بيساعد على منع الشعر انه يفقد البروتين الطبيعي الي موجود فيه، ولو كان شعرك فيه كمية كافية من البروتين ومش محتاج لأي إضافات، فبلاش تستخدمي زيت جوز الهند علشان ممكن يسبب ساعتها جفافه ويتكسر بسبب البروتين الكتير الي فيه، ولو كان شعرك حساس من كمية البروتين الي فيه فهو كده مش محتاج كمية أكبر من البروتين، علشان كده امنعي استخدامه ومتعمليش أي حمام زيت بيه علشان ميبوظش شعرك.

البنات الي شعرها حساس من البروتين عادة بتكون مسامية شعرها منخفضة.

طرق استخدامه:-

ترطيب عميق:- سخني شوية من الزيت على النار لحد مايدفى وحطيه على شعرك وهو رطب او جاف قبل ماتغسليه، وسبيه على شعرك لمدة ليلة كاملة، وبعدين اغسليه الصبح.

الشعر الي فيه حساسية من البروتين : ممكن تضيفي شوية زيت تاني زي زيت الزيتون وزيت الأرجان وزبدة الشيا وزيت الخروع الي هو أفضل زيت بالنسبة ليا، وبعدين لفي شعرك بغطاء الشعر علشان تستفيدي بأكبر قدر من الترطيب.

نمو الشعر:- استخدمي صوابع ايديكي في تدليك فروة راسك بكمية بسيطة من زيت جوز الهند بليل، ولو شعرك طويل فهيكون سهل عليكي تقلبي راسك لتحت وتدلكي فروة راسك علشان الزيت يوصل لفروة الراس بشكل كامل، واعملي كده كل يوم وهتلاقي شعرك بيطول وينمو بسرعة.

ملحوظة : استخدمي كمية قليلة من الزيت بس علشان متضطريش تغسليه كل يوم، وتطمني ان شعرك مبيفقدش اي عناصر مغذية بيحتاجها.

للحصول على مسامية شعر اعلى :-  اغسلي شعرك كويس، وضيفي 3 قطرات من الزيت على بلسم الشعر بتاعك على كل حتة في شعرك علشان تقفلي الرطوبة، وبعدين اغسليه كويس.

استخدمي أطراف صوابعك في تدليك شعرك بالزيت في نهاية أطراف شعرك، وابدئي من الأطراف من تحت، وبعديك فكي شعرك كويس بصوابعك وبعدين استخدمي المشط.

زيت بذور العنب:-

ده زيت مضغوط من بذور العنب، وبيحتوي على مضادات أكسدة ومضادة للإلتهابات الي بتساعد على حماية الشعر وتعزيز نموه والتمتع بشعر صحي وحيوي، ولما بتختلط الزيوت العطرية بالزيوت الأساسية فبتكتمل فوائد زيت بذور العنب العطري

فوائد زيت بذور العنب:-

بيحتوي على فيتامين E  الي هو مضاد للأكسدة  فيساعد على بناء الأنسجة وبالتالي بيساعد على ان الشعر يبقى قوي وحيوي

بيمنع تساقط الشعر: بيحتوي على مضادات الأكسدة الي بتساعد في منع انتاج DHT وده هرمون بيسبب تساقط الشعر.

بيقلل قشرة الراس: قشرة فروة الراس بتسبب فروة جافة وضعيفة، وبما ان الزيت ده غني بالمرطبات والمغذيات الي بيحتاجها الشعر فبيساعد على تغذية نمو خلايا جلد جديدة وصحية.

ترطيب وتنعيم الشعر: زيت بذور العنب أخف من زيت جوز الهند او زيت الزيتون ومش بيسيب الشعر تقيل او دهني ، وكمان بيساعد على قفل الرطوبة وبيمنع تجعيد الشعر، وتقصف اطرافه، والشعر الهش.

طرق استخدامه:-

تقوية الشعر : دلكي فروة الراس بزيت بذور العنب بعد ماتسخنيه شوية، وبعدين غطي شعرك كويس، وممكن تضيفي شوية من زيت اللافندر او زيت الروزماري علشان تستفيدي باكبر قدر من الزيت،وبعدين لفي شعرك طول الليل واغسليه الصبح علشان تتمتعي بشعر صحي.

بيقلل تساقط الشعر: اخلطي شوية من زيت بذور العنب مع زيت الجوجوبا ودلكي الخليط بفروة راسك علشان تعالجي مشكلة تساقط شعرك، وممكن تضيفي قطرات بسطية من زيت الروزماري او زيت النعناع بس متحطيش كمية كبيرة علشان متحتاجيش تغسلي شعرك كل يوم.

بيقلل قشرة الراس: قبل ماتستحمي دلكي فروة راسك بزيت بذور العنب بحركات دائرية براحة علشان تخففي من حدة الجلد وتسمحي لفروة الراس انها تمتص الزيت.

الترطيب والتنعيم: حطي شوية من زيت بذور العنب على شعرك وهو مبلول وسبيه لمدة 10 دقايق ، وبعد كده اشطفيه بالمية الباردة للحصول على افضل نتيجة.

 زيت الجوجوبا :-

مليان نسبة كبيرة جدًا من فيتامينات  D,A,E ومفيد جدًا لكل أنواع الشعر، وممكن تلاقيه في منتجات كتير للشعر، بس بيكون أكتر فعالية لو استخدم لوحده

فوائد زيت الجوجوبا:-

بيساعد على أنه يصلح الشعر التالف، وان الشعر يطول وينمو بشكل صحي أكتر

بيحتوي على خصائص مضادة للبكتيريا، وكمان هو الزيت الوحيد الي بيناسب كل الزيوت الطبيعية الموجودة في فروة الرأس، وده بيساعد في موازنة انتاج الزيت وفي تقليل تهيج فروة الرأس.

بيساعد في الحفاظ على صحة الشعر وبالتالي بيخلي الشعر ينمو أسرع ويحافظ عليه بشكل مستمر.

طريقة استخدامه:-

ماسك للشعر : اخلطي كوباية واحدة من زيت الجوجوبا وضيفيله شوية قطرات من زيت اللافندر او الروزماري العطري لو كنش عندك زيوت قوية، ودلكي فروة راسك كويس بالخليط لحد ماتشربه كله، وبعدين غطيه بغطاء الشعر، وسبيه على شعرك لمدة ليلة كاملة، او لمدة ساعة، وبعدين اغسليه بالطريقة المعتادة.

ترطيب الشعر :- حطي شوية من زيت الجوجوبا على شعرك بعد ماتغسليه بالشامبو، وسبيه شوية دقايق، وبعدين اغسليه كويس.

تنعيم الشعر : علشان توقفي مشكلة شعرك الناشف، وتساعديه في الحفاظ على رطوبته ، املي ازازة صغيرة بزيت الجوجوبا، ورشي رشة صغيرة منه على شعرك بعد ما يكون ناشف خالص من الاطراف للجذور.

علاج تقصف الأطراف: دلكي أطراف شعرك بشوية زيت جوجوبا بلطف كل يوم ومتغسليهاش.

زيت الزيتون:-

مليان فيتامينات ومعادن ومضادات الأكسدة ومصدر جيد لحمض الفوليك ( أحماض أوميجا الدهنية) وبيساعد على الترطيب وتنعيم الشعر، وعلاج مشكلة قشرة الراس.

فوائد زيت الزيتون:

زيت الزيتون ممتاز للشعر بشكل كبير، وبيخلصه من أي مشكلة تجعد فيه.

فيه خصائص مضادة للإلتهابات بتساعد على تهدئة تهيج فروة الرأس.

قوامه الكثيف بيخليه مثالي للشعر الي بيمتص منتجات الكريم بسرعة وخاصة الشعر الي مساميته عالية، وبيحمي الشعر من الرطوبة والجفاف الشديد لعدة أيام.

طريقة استخدامه:

ترطيب عميق: دلكي شعرك كويس من الاطراف للجذور بشكل عميق وهو ناشف بزيت الزيتون، وبعدين لفيه بفوطة دافية وسبيه لمدة 30 دقيقة، وبعدين اغسليه كويس وعلشان يكون رطب أكتر ممكن تضيفي شوية عسل صغيرين لزيت الزيتون وتحطيه على شعرك.

ترطيب يومي: دلكي أطراف صوابعك لشعرك بشوية زيت زيتون دافئ وتأكدي انه بعيد عن الجذور علشان تضمني أفضل طريقة للتخلص من تجعد الشعر.

زبدة الشيا : عبارة عن زيت دهني صلب مشتق من بذورثمار شجرة الشيا، وكمان غني بفيتامين A,E,F ، وبيوفر حماية طبيعية من أشعة الشمس الفوق بنفسجية بسبب FBS 6

فوائد زبدة الشيا:-

بتلطف فروة الرأس الجافة: لأنها غنية بفيتامين  A , E وبتهدي أي جفاف في الشعر، وبتصلح أي تكسر في الشعر، وبتعالج الأطراف المتقصفة

مرطب وبلسم طبيعي: بتحتوي على فيتامين A,E الي بيساعدوا على ترطيب الشعر من الجذور للأطراف.

واقي شمس طبيعي ومقاوم للحرارة: بيحمي الشعر من أشعة الشمس، وبيحميها من العلاجات الكيماوية ومجفف الشعر، واجهزة فرد الشعر، والملح والكلور الي موجودين في البحر وحمامات السباحة.

طرق استخدامه:-

مرطب طبيعي : سخني زبدة الشيا لحد ماتذوب، وبعدين حطيها على الشعر وهو رطب مع الشامبو، وسبيها لمدة 5 او 10 دقايق، وبعدين اغسليه كويس.

تخفيف حكة فروة الرأس الجافة: خدي كمية من زبدة الشيا السايحة على اطراف صوابعك ودلكي بيها فروة الراس كويس لحد ما الفروة تمتصها تمامًا، واستخدميها من مرتين ل 3 مرات في الأسبوع علشان تستمتعي بشعر صحي في وقت قصير.

حمام زيت سخن: ممكن تستخدمي زبدة الشيا لوحدها او مع شوية زيوت زي زيت جوز الهند، أو زيت الخروع، وحطي الخليط على شعرك قبل ماتستحمي وسبيه من نص ساعة لساعة، وبعدين اشطفيه بالطريقة المعتادة، وبعيدًا عن باقي الزيوت، فغسل الشعر من زبدة الشيا بيكون سهل جدًا، ولكن لو استخدمتيها مع الزيوت التقيلة الي قولنا عليها فساعتها هتحتاجي لشامبو خالي من الكبريت علشان تغسليه كويس.

تنعيم الشعر: حطي كميو صغيرة على الشعر وهو رطب علشان يساعد على قفل رطوبته بعد ما تغسليه على طول، وممكن تستخدميها مع البلسم أو الكريم بتاعك.

زيت اللوز الحلو:-

بيتم استخراجه من اللوز الخام، وفيه كمية كبيرة من الأحماض الدهنية الأحادية غير المشبعة، وفيتامين E ، والبوتاسيوم والبروتين، والزنك ومعادن وفيتامينات كتيرة.

تحذير : ممكن يسبب حساسية ورد فعل سئ للي بيعانوا من حساسية اللوز.

فوائد زيت اللوز الحلو:-

بيخترق جذور الشعر بسهولة، وبيساعد على ترطيب الشعر بسرعة من جوا.

بيساعد على التحكم في تساقط الشعر.

بيحمي الشعر من الحرارة الطبيعية.

بيخلصك من مشكلة الاطراف المتقصفة.

طرق استخدامه:

بيمنع تساقط الشعر: حطي معلقة كبيرة دافية من زيت اللوز الحلو على فروة راسك وافركيه بلطف وسبيه لمدة ليلة كاملة علشان الزيت يمتصه فروة الراس كويس، ومتحطيش كتير علشان متحتاجيش تغسلي شعرك كل يوم

ماسك للشعر : ممكن تستخدميه لوحده أو مع زيوت تانية، وتدلكي بيه فروة الراس ، والبسي غطاء الشعر ، وسبيه لمدة ساعة كاملة، وبعدين اغسليه كويس.

بيحمي الشعر من الحرارة : لو كنتي بستخدمي السيشوار او المكواة لشعرك، فاغسلي شعرك كويس وبعدين نشفيه ، وبعدين حطي قطرات من زيت اللوز الحلو علشان تحمي شعرك من أي حرارة.