المتجوزين عندهم حالة مسئولية وملل وصراع يومي، فابعدوا عنهم، العزاب يشاغلوا بعض ويحبوا بعض .. يمكن يتجوزا .. بس بلاش خراب بيوت أوعقول الناس المرتبطة.
من اسوأ الاشياء في الحياة أن ست تقول لراجل متجوز، يعني بجد مراتك مش بتحضرلك العشاء .. بتهزر ! .. بجد أنت بتكوي لنفسك ياشيخ قول كلام غير ده، أنت بتجيب العيال من المدرسة .. امال هي وظيفتها ايه ؟!

آلهي تشكي في معاميك يابعيدة وأنتي مالك ماتسيبي الناس في حالها كل واحدة حرة تعود جوزها ولا تعشيه ولا تكويله .. ليه تقلبيه عليها

وأنت اوعي تصدق أن مراتك وحشة ومقصرة علشان كلمتين خايبين من واحدة متقدرش تشيل نص همك أو مسئولية بيتك وعيالك أهي بترغي نفسنة علي عيشتك وخلاص.

وكذلك الرجالة .. بلاش ونبي حد يصطاد في المية العكرة

ايه ده هو حد يزعل القمر ده ؟

ونبي جوزك معاه جوهرة بس مش مقدرك

بتطبخي كل يوم ..كل يوم ومش بيقولك شكرا ليل ونهار ده قاسي اوى

آلهي تشك في معاميعك يابعيد، بتقلبها علي جوزها ليه والستات ودنية، اوعي تصدقي، هولو كان مكان جوزك كان مرمطك ستين الف مرة، أهو بيحلوعليكي وفرفطة رمان، وقت الجد بخ مش هتعرفي غير الوش التاني

بلاش المتجوزين، سيبوهم في حالهم.

الراجل العازب يفضل يشاغل في ست متجوزة ويخرب في ودانها ولو هي عاقلة هتثور في وشه وتحطله حد لكن من جواها بتقاوم والمقاومة مرهقة ..ولو هي عبيطة هتتمادي وتندم لما تلاقيه ندل والغريب في الامر لو هو اتجوز يقطع علاقته بيها أول واحدة ويخاف علي زعل مراته

وكذلك الست الغير مرتبطة تفضل تزغلل عين راجل متجوز وهو وأخلاقه .. يمكن يتمادي وتحلو المغامرة في عينه ويمكن يقرب لمراته ويتقي ربنا .. لكن أيضا مقاومة النفس الامارة بالسوء ومقاومة زغللة الحرام الحلوة صعبة ولو الست دي اتجوزت أول حاجة تعملها أنها تبيعهم كلهم ولا كأنها تعرفهم.
الزوج في الغالب بيعيش حالة ملل من نفس الست اللي حفظ شكلها وهي حلوة وهي منكوشة واتخانقوا كتير وسنين عدت ومراته مطحونة بالعيال .. فارجوكي كست محترمة متعاكسيش راجل متجوز، هو مشتاق يعيش بطولاته من جديد وأي ست تقوله شكلك حلو النهارده يامدحت هيحس أنه بقي رشدي اباظة وهو أساسا اسماعيل يس

والزوجة غالبا جوزها مطحون في الشغل ومصاريف المدارس والهدوم والعيشة وبيقولها كلمة حلوة في المناسبات لو افتكرفلو أي راجل عدي قالها الله شكلك حلو هتتحول لفاتن حمامة، مش علشان هي سيئة الخلق لا علشان أحنا بشر والجواز بيطحن جدا.

.سيبوا المتجوزين في حالهم الله يخليكوا