اضغط هنا لقراءة المقال بالانجليزية

.الحياة رحلة بنعيشها رحلة مليانة بالفرح والحزن ، بالراحة والسلام وبالقلق والتحديات ، رحلة فيها النهار والليل ، النور و الظلام الربيع والخريف

.مقياس درجة جودة حياتنا بيتوقف علي ازاي بنقدر نواجه تحديات وصعوبات الحياة

مبدأيا خلينا نعرف يعني ايه ” تحديات حياة” وايه الهدف منها وازاي نقدر نتغلب عليها ؟

كتير مننا اول ما بيسمع كلمة تحديات او صعوبات الحياة بيجي في بالة المصايب والكوراث وكل الحاجات الي بنخاف تحصلنا !! و لكن علي العكس تحديات الحياة ما هي الا اختبارت وامتحانات من ربنا دروس بنتعلم ونستفيد منهت ونرتقي للاحسن من خلالها و هو دا الهدف الاساسي من وجودنا في الرحلة او في الحياة

في كل محنة منحة  وفي كل تحدي درس بيخلينا اقوي واقدر علي مواجهة الي بعده ودا الي بيفسر ليه في ناس كتير بتقع في نفس المحنة مرات ومرات مع اختلاف السيناريوهات ودا ببساطة لان الرسالة او الهدف منها لسة موصلش وبالتالي بيستمر في التكرار

الحياة مدرسة وتحدياتها هي الدروس التي يجب ان نتعلمها ومن ثم الانتقال من مرحلة لمرحلة اخري

وعلشان نقدر نواجه تحديات الحياة بسلام لازم يكون عندنا طرق و مهارات نقدر نواجه بيها ومنها

التأقلم الايجابي

كتير لما بنواجه اي مشكلة او تحدي بنسلم و بنعيش في دور الضحية وان هي الظروف كدا واننا لازم نقبل بالأمر الواقع !! قبول الامر الواقع  والتأقلم مع اوضاع الحياة المتغيرة شئ مفيد لو كان تأقلم ايجابي بمعني هقبل المشكلة وهعمل بكل جهدي علي ايجاد حل ليها عكس التأقلم السلبي وهو الرضوخ وقبول الاوضاع بحجة ملهاش حل

التفاؤل

التفاؤل والنظرة الايجابية للامور من اهم مفاتيح حل اي مشكلة والصمود امامها مهما كانت صعبة . الامل بيدينا دفعة قوية لتحقيق اي شئ و بيقلل التوتر والقلق الي بسببه بنشوف اي حاجة مستحيلة

 

المرونة

المرونة ببساطة هي قبول اوضاع الحياة المتغيرة ، كتير بنرسم خطط وسيناريوهات لشكل حياتنا ولما بيحصل حاجة تانية غيرها بنبقي رفضانهاورافضين  حتي مجرد اننا نجرب ونشوف يمكن تكون حاجة احسن من الي اتمنناه . المرونة مطلوبة لمواجهة تحديات الحياة مش شرط كل توقعاتنا وخططنا لشكل الحياة تنجح . محدش يقدر يسيطر علي كل احداث الحياة الي هي متغيرة ومش ثابتة علشان هي دي الحياة

 

التواصل

الانسان كائن اجتماعي بطبعة وربنا جعلنا شعوب وقبائل لنتعارف . في المواقف الصعبة والازمات بنحتاج حد يساندنا ويدعمنا نستشيره او حتي مجرد نحكيله ويسمعنا مجرد تفريغ شحنة المشكلة بيدينا احساس بالراحة وبالتالي بالقدرة علي ايجاد بدائل وحلول

 

 ثق في نفسك

الثقة في النفس مش بس مطلوبة في الصمود امام التحديات بل مطلوبة في جميع اوجة الحياة .خليك واثق في نفسك وفي قدرتك علي مواجهة الامور والاوضاع . خد قرارك وخليك واثق فيه حتي لو طلع غلط لان اكيد مش هتعرف الصح الا لما تعرف ايه الغلط

 خد خطوة

دور وفتش وعافر في ايجاد حل لاي وضع مش عجبك عمر ما الحل هيجي لوحده من غير ما تسعي ليه . خليك مسئول عن كل حاجة في حياتك متخليش اي وضع يتحكم فيك

 

واخيرا وليس اخرا عيش الحياة جرب حاول انحج افشل افرح احزن عيشها بكل ما فيها ارضي بيها هتراضيك ثق فيها هتثق فيك وتديك الامان

“الحياة حلوة بس نفهما”